يعني إيه دعوى إثراء بلا سبب؟.. حقك مش ضايع حتى لو مفيش ورق!
بقلم: أحمد عبد الحكيم المحامي بالاستئناف العالي ومجلس الدولة- ماجستير في القانون الجنائي
كتير مننا بيقع في موقف إنه “يعمل مصلحة” لحد، أو “يتحول له فلوس غلط”، أو “يأدي خدمة” وفي الآخر الطرف التاني ياخد المصلحة ويخلع، والحجة الدايمة: “إنت معاك ورق؟.. بليت الشربات؟”.
على بلاطة كدة، الإثراء بلا سبب هو موقف شخص “جيبه كبر” أو “استفاد” على قفا شخص تاني من غير ما يكون فيه سبب قانوني أو عقد يبرر الزيادة دي. القانون بيقول: “محدش يغتني على حساب غيره بغير وجه حق”.
القانون المصري مصحصخ جداً للنقطة دي، وعمل “دعوى الإثراء بلا سبب” عشان يقول لكل واحد “محدش يغتني على قفا غيره بغير وجه حق”. لو حقك ضايع عشان مفيش عقد، التقرير ده هو بوصلتك عشان ترجع حقك بالمليم.
1. إمتى تقول حقك ضاع وتقدر ترفعها؟
تقدر ترفعها لما تلاقي توازن مختل: طرف (المثري) زادت فلوسه أو وفر مصاريف، وطرف تاني (المفتقر) خسر فلوس أو بذل مجهود، ومفيش “عقد” أو “قانون” بيشرح ليه ده حصل.
2. لازم عقد؟
لا طبعاً، وده جمال الدعوى دي! هي معمولة أصلاً عشان تحميك لما ميكونش فيه عقد. لو فيه عقد، بنروح لدعوى “مسؤولية عقدية”، لكن الإثراء بلا سبب هي “المنقذ” لما تغيب الورقة.
3. حولت فلوس غلط؟
أول خطوة بلّغ البنك أو شركة الاتصالات فوراً. لو الطرف التاني رفض يرجعها، “دعوى الإثراء بلا سبب” هي طريقك القانوني لأن الشخص ده دخل ذمته فلوس مش حقّه وبدون سبب.
4. واحد استفاد بيا ومفيش ورق؟
لو عملت شغل أو قدمت خدمة لشخص واستفاد منها (زي دهان شقة أو تصليح سيارة) ومفيش عقد، تقدر ترفع الدعوى وتطالب بقيمة المنفعة اللي هو خدها.
5. تنفع بين القرايب والصحاب؟
تنفع جداً. القانون مبيفرقش بين “ابن خالة” أو “غريب” طالما حصل إثراء لطرف على حساب طرف تاني بدون مبرر.
6. خدمة اتعملت من غير اتفاق على فلوس؟
لو الخدمة دي “مش تبرع” (يعني طبيعي بتتعمل بفلوس)، المحكمة بتقدر قيمة الخدمة دي وتلزم المستفيد يدفعها بناءً على مبدأ الإثراء.
7. شروط قبول الدعوى:
إثراء: طرف كسب (فلوس زادت أو دين سددته عنه).
افتقار: طرف خسر (فلوس نقصت أو مجهود ضاع).
علاقة سببية: خسارتك هي اللي خلت التاني يكسب.
انعدام السبب: مفيش عقد ولا قانون بيقول إن التاني يستحق ده.
8. تثبت إيه قدام المحكمة؟
لازم تثبت بجميع طرق الإثبات (شهادة شهود، تحويلات بنكية، رسائل واتساب) إن الطرف التاني استفاد مادياً أو وفر على نفسه مصاريف بسبقك.
9. الضرر واقع ولا احتمال؟
لازم يكون الضرر وقع فعلاً (افتقار حقيقي). القانون مبيحكمش على “احتمالات” في الإثراء.
10. المحكمة بتحكم بإيه؟
المحكمة بتحكم بالتعويض عن الأقل من قيمتين: قيمة “الإثراء” اللي حصلت للمدعى عليه، أو قيمة “الافتقار” اللي حصلت لك.
11. ليها مدة معينة؟ (التقادم)
أيوة، تسقط الدعوى بمرور 3 سنوات من يوم علمك بحقك، أو 15 سنة من تاريخ نشأة الحق (أيهما أقرب).
12. ينفع من غير محامي؟
في المحاكم الابتدائية والجزئية (حسب قيمة المبلغ)، القانون بيشترط وجود محامي لرفع الدعوى ومباشرتها لضمان الإجراءات الشكلية.
13. الفرق بينها وبين “المطالبة بدين”؟
المطالبة بدين: لازم يكون فيه “سند” (وصل أمانة، شيك، عقد).
الإثراء بلا سبب: هي البديل لما “السند” يغيب.
14. هل كل استفادة إثراء بلا سبب؟
لا. لو الاستفادة ناتجة عن “تبرع” منك أو “تنفيذ لعقد” أو “نص قانوني”، متبقاش إثراء بلا سبب.
سؤال الختام: إمتى أقول ده حقي وإمتى مالوش لازمة؟
قول “ده حقي” لو تقدر تثبت إن الشخص التاني وفر قرش أو كسب قرش كان المفروض يكون في جيبك، ومعاك ما يثبت ده (حتى لو شات واتساب أو شهود).
وقول “مالوش لازمة” لو كانت الحاجة اللي عملتها بنية “المجاملة أو التبرع” في الأول، أو لو مفيش دليل خالص يربط بين مكسبه وخسارتك.
بعض أحكامنا مكتبنا بالصور :
